Tøknibreytin
Tøknibreytin er til ung fólk, ið hava hug og dirvi at royna okkurt innan tekniska økið.
Tú ognar tær royndir innan bil-, metal- og elektronkkfakið, ið gera teg betur føran fyri at velja tær lívsleið.
Tú verður brynjað(ur) at taka við teimum avbjóðingum, ið vinnan og samfelagið bjóða tær, og tú verður fyrireikað/ur at fara út í vinnuna og samfelagið.
Í holdunum kunnu í mesta lagi vera 15 næmingar og er minstamarkið 12 næmingar.
Tú kanst velja eina av breytunum, sum tú so hevur alt skúlaárið.
Smiðju- og maskinbreytin
Endamál
At næmingurin fær innlit í og grundleggjandi vitan um smiðju- og maskinyrkið. Undirvíst verður soleiðis, at næmingurin fær bæði innlit í søguliga og ástøðiliga partin – men í mestan mun verkliga partin innan smiðju- og maskinyrkið, har næmingurin sleppur at royna síni handaligu evnir á verkstaðnum.
Innihald
- Fær grundleggjandi vitan um sveising
- Lærir at nýta ymisk hond- og maskinamboð
- Fær grundleggjandi vitan um trygd á verkstaðnum
- Fær grundleggjandi vitan um smiðjuyrkið
- Gera smærri handaligar uppgávur
Starvsleið
- Rør- og blikksmið
- Kleinsmið
- Sveisara
- Maskinsmið
- Hægri lestur, so sum framleiðslutøkningur, maskinmeistari, verkfrøðingur, o.s.fr.
Bilbreytin
Endamál
Endamálið við undirvísingini er at geva næminginum góða fatan av lærugreinini.
Harafturat menna vit næmingin til útbúgving í fakinum.
Innihald
Á bildeildini hevur tú møguleika til at læra um bilar og um ymisku skipanirnar í bilunum.
Í undirvísingini er ástøði, sum vit arbeiða víðari við á verkstaðnum. Vit kanna mekanikkin í motorunum, hvussu motorarnir virka og hvørja ávirkan teir hava á umhvørvið.
Eisini verður undirvíst í bremsunum.
Nærum einki í bilinum virkar uttan el – komið verður víða um á økinum.
Frálæra er um løði-, startara- og lyktaskipanina er partur av ellæruni.
Harumframt verður undirvíst í róðurgreiðunum, fjaðring, umframt innlit í hvussu gearkassi og koblingar virka.
Undirvíst verður eisini um tøknina í el-bilum.
Næmingarnir byggja R/C-bilar (stødd 1:10), sum eru átøkir bilum í vanligari stødd við róðurgreiðum, upphangi, fjarðing, útveksling og lakering.
Starvsleið
Bilmekanikari
El- og elektronikkbreytin
Endamál
Tøknibreytin er til teirra, ið ynskja at ogna sær vitan og royndir innan el- og elektronikkfakið.
Á El-deildini fert tú at arbeiða innan el- og elektronikk, har tú lærir um mótstandar, diodur, transistorkáplar, avbrótarar, stikkkontaktir, og har tú eisini lærir at brúka ymisk mátitól.
Arbeitt verður við elektronikki á printstøði, har tú lærir at útleggja komponentar til print og gera printplátur. Eisini verða arbeitt við at gera automatiskar stýringar á teldu til elektroniska útgerð so sum PLC, Arduino v.m.
Næmingurin fær innlit í fakøkið “elektronikkur”. Tvs. el-læru, komponentlæru, printplátutekning, diagramm-fatan, lodding og hugskotsmenning.
Eisini nakað av feilfinning á printplátum.
Næmingurin skal hava egna farteldu og mús við. Stýrisskipan kann vera Windows, MacOS ella Linux. Chromebook kann ikki nýtast. Forritið “KiCAD” verður nýtt.
Undirvísingin er egnað bæði til gentur og dreingir. Elektronikk-menning er teknisk stuttlig, kreativ og er positivt avbjóðandi fyri øll.
Innihald
- Tekna printplátu og bíleggja á netinum (3-5 ferðir um árið)
- Velja komponentar – eisini bíleggja á netinum
- Lodding
- Samla og lodda ymisk byggisett
- Forritan í Arduino at máta og stýra við
- Nakað av el- og elektronikksøgu
- Læru um grundleggjandi komponentar og um:
– mótstøðu, kondensatorar, spolar, diodur, transistorar, microprosessorar - Innleggingar
- Stýringar
Starvsleið
Ert tú áhuga/ur í el- og elektronikki og ætlar tær útbúgving innan økið, so er henda tøknibreytin nakað fyri teg.
Framtíðar starvsleið kann verða:
- Elektrikari
- Elektronikfagteknikari (lærupláss í FO, skúla í DK)
- Elektronikverkfrøði
- Forritari
- Hægri lestur innan alisfrøði, KT o.a.